The Ulster-Scots Language Society, formed to promote the Ulster-Scots language, our own hamely tongue

Oh! Whiskey My Darlin'

(Taken from A Collection of Poems and Songs, on Rural Subjects, Robert Huddleston [Belfast: J. Smyth, 1844])

O, whiskey my darlin', thou care-killin' carlin,
How aft I have kissed thee for weeks at a time;
And aye whan I'm drinkin', thou easest my thinkin'
And now I'm come back for tae taste thee again.

CHORUS.

O! a toss o' my head for a' their laid denties,
Gie me but the nappie tae kittle my joy;
An' tho' poortith shall stare me, it darna come near me,
A fig for sad sorrow, I'll live till I die.

Frae this tae the mornin' jade care I'll gie scornin',
An' lieve on the juice o' the blanter sae dear;
Ye winds that loud chatter, I carna your clatter,
Your frosty smell breath now me canna come near. [smell = snell?]
O! a toss o' my head for a their laid denties, &c;.

Yon silly aul' base ane, on verge o' perdition
Wi' deadly excesses, debauchery, an' crime;
Shall I grudge him his dishes, his trashtrie, an' wishes?
No, never such baseness - no, never be mine.
O! a toss o' my head for a' their laid denties, &c;.

Gie me the Cork caver, wi' mountain dew flavour,
The poteen tae drink, an' my lassie alang;
Tho' warls care may wreck me, it ne'er can heartbrack me,
Sae lang as the usquebaugh stifles my rang.
O! a toss o' my head for a' their state denties, &c;.

O! whiskey, stick tae me, thou frien' o' my grannie,
Tho' weel I may like ye, I tak' it o' kin';
My aul' uncle Tammie, the twin o' my mammie,
Besides my aul' daddie, he drunk himsel' blin'.
O! a toss o' my head for a' their state denties, &c;.

Away antie Nelly, an' let us be jolly,
Ye ken yon big-wamed jug that's far aboon a';
An' fetch us a quart in before we gae partin',
And roun' by the ingle we'll joyful hurra.
O! a toss o' my head for a' their state denties, &c;.


Search


Navigation