Anent Oorsels

Tha Ulstèr-Scotch Leid Societie wus stairtit in 19 an 92 wi a wheen o fowk whase hairt lay tae tha leid an at wus gye an fasht aboot tha tynin o buddies at taak’t tha leid. The’ thocht this wus maistly acause o tha swee o schuilmaistèrs an ither fowk at wus heich-set tae pit weans aff taakin Ulstèr-Scotch. The’ wur ettlin at threapin tha mense o tha leid, warkin tae gie a heeze tae its stannin an leukin fowk tae yaise it whaniver the’ wur taakin an scrievin. Frae this oot, tha Societie taen tent forbye tae fordèr Ulstèr-Scotch fowkgates, an ower tha yeirs maist o oor memmers, forbye leukkin tha gate o tha leid, yokks til pipe banns, Ulstèr-Scotch kines o dancin an fowk sangs an ranes.

Whiles, tha Societie pits oot its buik, Ullans, at kythes Ulstèr-Scotch scrievin, auld an new, tae aabodie, an fur tha maist feck o oor day it wus aa tha yin in Norlin Airlann at ettled at thon yin enn’s erran. Thegither wi oor claught curn, tha Ulstèr-Scotch Academie, we hae taen tae dae wi tha ootpit o a hale clattèr o ither buiks in an anent Ulstèr-Scotch, an tha twa at tha maist feck o fowk wad be leukkin is James Fainton’s Hamely Tongue, a dictionar o modren Ulstèr-Scotch frae tha coontie Antrim, an Phïïp Roabysin’s Ulstèr-Scots: A Grammar of the Traditional Written and Spoken Language.

Monie o tha memmers at’s mair jeein is weel yokkit intil wark tha like o tha Tape Recoardit Scance (recoardin yins at taaks Ulstèr-Scotch in tha coonties Antrim an Doon), pittin sindèrie auld scrievins oan tae tha computèr, an tha owersettin o tha Wurd at’s owergaed wi Phïïp an Heather Saundèrs o Wycliffe Bible Translators. We’r hairt-gled tae hae oniebodie at jynes tha Societie tae tak pairt in onie o this wark an tae pree scrievin thairsels in Ulstèr-Scotch forbye. Forbye leukkin memmers at wad be free tae convene as locyal curns claught wi tha Societie, we’r leukkin tae tak oan oncum offysers tae wark wi memmers in thair ain airt tae guide wi an ee tae tha kintrie-pairt the’r frae.

Tha Commïttee taks tae dae wi tha rinnin o tha Societie an it foregaithers ilka montht. Forbye its ither darg, it wad tent fur threapin wi tha goverminn furtae leuk mair jonick guidin fur tha leid ootby tha hame.

Tha Ulstèr-Scotch Leid Societie isnae claught wi onie pairtie an it’s hairt-gled tae hae aabodie at leuks tha gate o uphaudin tha ettlins o tha Societie. It daes its devoir furtae kep tha inpit tae a heicht at buddies haes tha reuchness tae pye, tha wye naebodie’s steekit oot acause the’ll no can haud oot tae it, an memmers gits Ullans fur naethin. Wud ye no thïnk o jynin us in fennin an fordèrin this leid at gaes tae tha hairt o oor ain hamelt heirskip in Norlin Airlann?